पोखरा। नेपाली काँग्रेसभित्र लामो समयदेखि देखिँदै आएको आन्तरिक गुटबन्दी, असन्तुष्टि र विवादको पृष्ठभूमिमा कास्की क्षेत्र नं. १ का लागि तिलक रानाभाटको उम्मेदवारीलाई धेरैले “सेफ र संगठनमुखी विकल्प” का रूपमा व्याख्या गर्न थालेका छन्। निरन्तर पार्टी राजनीतिमा सक्रिय रहँदै आए पनि प्रत्यक्ष विवादमा नपरेका, संगठन निर्माण र संस्थागत काममा बढी चिनिएका रानाभाटलाई काँग्रेसले प्रतिनिधिसभा सदस्यको उम्मेदवार बनाउनु पछाडि यही सन्तुलनको खोजी मुख्य कारण मानिएको छ।
कास्की काँग्रेस अघिल्लो निर्वाचनदेखि नै आन्तरिक द्वन्द्वको चपेटामा रहँदै आएको थियो। टिकट वितरणकै विषयमा उत्पन्न विवाद, नेताहरूबीचको सार्वजनिक असन्तुष्टि र कारबाहीसम्म पुगेको घटनाले पार्टी कमजोर बनाएको अनुभूति केन्द्रसम्म पुगेको देखिन्छ। यही परिस्थितिमा पार्टी नेतृत्वले यसपटक विवादमा तानिएका भन्दा पनि संगठनसँग लामो समयदेखि जोडिएका, केन्द्र र जिल्लाबीच समन्वय गर्न सक्ने र कम विवाद, बढी संगठन को छवि बनाएका पात्रलाई अघि सार्ने रणनीति लिएको बताइन्छ।
विद्यार्थी राजनीतिबाट सुरु भएको रानाभाटको राजनीतिक यात्रा नीति, प्रशिक्षण, निर्वाचन परिचालन र आर्थिक समितिसम्म आइपुगेको छ। तीनपटक महाधिवेशन प्रतिनिधि, नीति तथा प्रशिक्षण प्रतिष्ठानको सदस्य, केन्द्रीय निर्वाचन परिचालन समितिको प्रतिनिधि र हालै सम्पन्न विशेष महाधिवेशनबाट केन्द्रीय सदस्य बनेका उनी पार्टी संरचनामा ‘ग्रासरुटदेखि केन्द्र’ सम्म अनुभव बटुलेका नेता हुन्। यही निरन्तरता र संस्थागत अनुभवले उनलाई कास्की–१ का लागि उपयुक्त उम्मेदवार बनाएको काँग्रेस वृत्तको बुझाइ छ।
पार्टीभित्र चर्चा भएजस्तै, विवादमा नपर्नु मात्र होइन, संगठनलाई प्राथमिकतामा राखेर काम गर्ने स्वभाव, केन्द्रसँगको पहुँच र व्यवस्थापन क्षमताले पनि रानाभाटको उम्मेदवारीलाई बल पुगेको देखिन्छ। वैदेशिक रोजगार व्यवसायीका रूपमा लामो अनुभव, कानुन व्यवसाय र विभिन्न आर्थिक संस्थामा संलग्नताले उनलाई व्यवस्थापन र नीतिगत विषयमा परिपक्व बनाएको पार्टी नेताहरू बताउँछन्।
कास्की–१ मा यसपटक काँग्रेसले विगतको आन्तरिक असन्तुलनबाट पाठ सिक्दै जितको सम्भावना बढाउने रणनीति अख्तियार गरेको संकेत रानाभाटको उम्मेदवारीले दिन्छ। विवादभन्दा टाढा, संगठनसँग नजिक रहेका तिलक रानाभाटलाई अघि सार्नु त्यसै रणनीतिको परिणाम हो—जसले काँग्रेसलाई कास्की–१ मा पुनः भरोसायोग्य प्रतिस्पर्धामा उभ्याउने अपेक्षा गरिएको छ।
