धुलिखेल, काभ्रे । लायन्स डिष्ट्रिक्ट ३२५ आई नेपालको तेस्रो क्याबिनेट पदाधिकारीहरूको दुईदिने बैठक काभ्रेको धुलिखेलमा शुक्रबारबाट सुरु भएको छ। डिष्ट्रिक्ट गभर्नर पार्वती खरेल पाण्डेको अध्यक्षतामा सम्पन्न बैठकको उद्घाटन सत्रमा लायन्स अन्तर्राष्ट्रिय फाउन्डेसनका एरिया लिडर आईडी ईन्डोर्सी राजन लम्साल प्रमुख अतिथिका रूपमा उपस्थित थिए।
बैठकको पहिलो दिन डिष्ट्रिक्टले पछिल्ला सात महिनाको अवधिमा गरेको कार्यसम्पादनको मूल्याङ्कन, कार्यक्रम तथा गतिविधिहरूको समग्र समीक्षा र भावी रणनीतिबारे क्याबिनेटका सिनियर लायन्स लिडरहरूबीच गहन छलफल भएको छ।
कार्यक्रममा बोल्दै प्रमुख अतिथि लम्सालले लायन्स डिष्ट्रिक्ट ३२५ आई नेपाल मल्टिपल डिष्ट्रिक्टभित्र उत्कृष्ट रहेको उल्लेख गर्दै हालसम्म हासिल भएका उपलब्धिलाई आधार बनाएर आगामी वर्ष अझै बढी उपलब्धि हासिल गर्नुपर्नेमा जोड दिए। देशको विकास र समृद्धिमा लायन्सले अघि सारेका समाजसेवामूलक कार्यहरू प्रशंसनीय रहेको बताउँदै उनले लायन्स सदस्यहरूले मन, वचन र कर्मबाट समाजसेवामा समर्पित भएर काम गरिरहेको धारणा व्यक्त गरे।
डिष्ट्रिक्ट गभर्नर पार्वती खरेल पाण्डेले वार्षिक कार्यक्रम कार्यान्वयन सुरु गरेको आधा कार्यकालमै डिष्ट्रिक्टले उल्लेख्य सफलता हासिल गरेकोमा खुशी व्यक्त गरिन्। उनले यस सफलतामा योगदान पुर्याउने सम्पूर्ण पदाधिकारी, क्लब र सदस्यहरूप्रति आभार प्रकट गरिन्।
कार्यक्रममा पीएमसिसी मनबहादुर रोका तथा पूर्व डिष्ट्रिक्ट गभर्नरहरू रामबहादुर बेसल, इन्दु लम्सालले लायन्स सदस्यहरूमा जस्तै सबैमा समर्पण, मन र लगाव भए समृद्ध मुलुकको सपना साकार पार्न कठिन नहुने बताए।
प्रथम भाइस डिष्ट्रिक्ट गभर्नर सूर्यकुमार केसी र द्वितीय भाइस डिष्ट्रिक्ट गभर्नर शैलेन्द्र मोहन भट्टराईले डिष्ट्रिक्टले सम्पन्न गरेका महत्वपूर्ण गतिविधिहरू र आगामी योजनाबारे प्रकाश पारे।
त्यस अवसरमा क्याबिनेट सेक्रेटरी रामबहादुर श्रेष्ठ र क्याबिनेट ट्रेजरर महेन्द्रकुमार राठीले सात महिनामा सम्पन्न कार्यक्रम तथा भावी रणनीतिसम्बन्धी प्रतिवेदन प्रस्तुत गरेका थिए। साथै, डिष्ट्रिक्टका पदाधिकारी, रिजन तथा जोन चियरपर्सनहरूले आ–आफ्ना जिम्मेवारी र भावी कार्यनीतिबारे जानकारी गराए।
शनिबार डिष्ट्रिक्ट अन्तर्गतका सम्पूर्ण सदस्यहरूको सहभागितामा फेलोशिप बैठक आयोजना गरिनेछ। बैठकको सम्पूर्ण तयारी पूरा भइसकेको जानकारी तेस्रो क्याबिनेट बैठक मूल आयोजक समितिका संयोजक धिरज श्रेष्ठले दिएका छन्। उनका अनुसार करिब १ हजार जनाको सहभागिता रहने अनुमान गरिएको छ भने ९ सय जनाले प्रि–रजिस्ट्रेसन गरिसकेका छन्।
तेस्रो क्याबिनेट मिटिङको मेन्टर भोला थापा तथा कार्यक्रम संयोजक डिष्ट्रिक्ट को–अर्डिनेटर धिरज श्रेष्ठको संयोजकत्वमा आयोजना सम्पन्न हुदैं गरेको बैठकको आयोजना काठमाडौं र काभ्रेका विभिन्न लायन्स क्लबहरूले संयुक्त रूपमा गरेका हुन्।
बैठक आयोजना गर्ने क्लबहरूमा लायन्स क्लब अफ काठमाडौं रञ्जना, काठमाडौं रक्तदाता समूह, काठमाडौं टेम्पल पिस काभ्रे, काठमाडौं पूर्व क्षितिज काभ्रे, काठमाडौं माँ चण्डेश्वरी, काठमाडौं बेथानचोक, काठमाडौं इन्द्रेश्वर, काठमाडौं काभ्रे गोसाइँस्थान तथा लायन्स क्लब अफ काठमाडौं काभ्रे नमोबुद्ध रहेका छन्।
