अन्नपूर्ण, कास्की । बाढी–पहिरोले क्षतिग्रस्त नयाँपुल–वीरेठाँटी–घान्द्रुक सडक पुनर्निर्माणको काम भूमिपूजासँगै अघि बढेको छ। विपद्ले सडक मात्रै भत्काएन, स्थानीय बस्ती, पर्यटन र जनजीवनमा समेत गहिरो असर पारेपछि यसको पुनर्निर्माणमा स्थानीय सरकारदेखि प्रदेश सरकार, सुरक्षा निकाय, निजी क्षेत्र र नागरिक समाज एकै ठाउँमा उभिएका छन्।
अन्नपूर्ण गाउँपालिका–८, ९, १० र ११ क्षेत्रमा बाढीपहिरोबाट भएको क्षतिपछि वीरेठाँटी बस्ती संरक्षण र सडक पुनः सञ्चालनलाई प्राथमिकतामा राखिएको हो। गाउँपालिका अध्यक्ष विष्णुबहादुर केसीले स्थानीय धार्मिक तथा सांस्कृतिक परम्पराअनुसार भूमिपूजा गरी ग्याबियन जाली भर्ने तथा सडक संरक्षणको काम शुभारम्भ गरेका हुन्।
यहाँ भूमिपूजा केवल धार्मिक कर्मकाण्डमा सीमित छैन। प्रकृतिको विनाशकारी शक्तिले क्षति पुर्याएको भूमिमा पुनः निर्माणको सुरुवात गर्दा भूमि, प्रकृति र स्थानीय संस्कृतिप्रति सम्मान प्रकट गर्ने परम्पराका रूपमा यसको विशेष अर्थ छ। निर्माण कार्य सुरक्षित, सफल र दीगो बनोस् भन्ने सामूहिक विश्वासका साथ भूमिपूजा गरिएको अध्यक्ष केसीले बताए। “विपद्मा एकता, सहयोगमा साथ” भन्ने भावना पुनर्निर्माणमा व्यवहारमै देखिएको बताउँदै अध्यक्ष केसीले तत्काल सडक सञ्चालनसँगै भविष्यमा बाढीपहिरोको जोखिम थेग्न सक्ने सुरक्षित र मजबुत संरचना निर्माण गर्नुपर्नेमा जोड दिए।
भूमिपूजासँगै वीरेठाँटी क्षेत्रमा मोदीखोलाको कटानबाट बस्ती जोगाउन खोलाको बहाव डाइभर्सन गर्ने काम सम्पन्न भएको छ भने ग्याबियन जाली भर्ने कार्य सुरु गरिएको छ। सडक बगेका तथा जोखिममा रहेका स्थानमा ग्याबियन संरचना निर्माण गरी तत्काल यातायात सञ्चालनमा ल्याउने र थप क्षति रोक्ने लक्ष्य राखिएको छ।
पुनर्निर्माणका लागि तमु धिं नेपालले तीन लाख तथा अन्नपूर्ण संरक्षण क्षेत्र आयोजना (एक्याप)ले २० लाख रुपैयाँ सहयोग गरेका छन्। गण्डकी प्रदेशको भौतिक पूर्वाधार मन्त्रालयले प्रारम्भिक चरणका लागि आवश्यक ग्याबियन जाली उपलब्ध गराएको छ। माछापुच्छ्रे, मादी र रुपा गाउँपालिकाले जनही पाँच लाख रुपैयाँ सहयोग गर्ने प्रतिबद्धता जनाएका छन्।
त्यस्तै, नेपाली सेनाले ग्याबियन भर्ने कार्यका लागि १०० जना स्वयंसेवक परिचालन गरेको छ भने उपल्लो मोदीखोला जलविद्युत् कम्पनीले एक्साभेटर उपलब्ध गराएको छ। गाउँपालिकाका इन्जिनियर शैलेन्द्र क्षेत्रीका अनुसार प्राविधिक तथा प्रशासनिक टोली फिल्डमै खटिएर पुनर्निर्माणलाई गति दिइरहेको छ।
घान्द्रुकको पर्यटन, व्यापार–व्यवसाय र दैनिक जनजीवनसँग प्रत्यक्ष जोडिएको सडक छिटो सञ्चालनमा आउँदा प्रभावित क्षेत्रले ठूलो राहत पाउने गाउँपालिका उपाध्यक्ष चन्द्रकला देवकोटा अधिकारीले बताइन्। उनका अनुसार यो पुनर्निर्माण सडक जोड्ने काम मात्र नभई घान्द्रुकको अर्थतन्त्र, पर्यटन र जनजीवनलाई पुनः गतिशील बनाउने अभियान पनि हो।
विपद्ले भौतिक संरचना भत्काए पनि त्यसले स्थानीय तह, प्रदेश सरकार, सुरक्षा निकाय, निजी क्षेत्र र नागरिक समाजलाई एउटै उद्देश्यमा जोडेको प्रमुख प्रशासकीय अधिकृत चिरञ्जीवी बरालले बताए। बरालले भूमिपूजाबाट सुरु भएको यो पुनर्निर्माण एउटा सडक बनाउने अभियान मात्र होइन—विपद्पछिको पुनर्जागरण, प्रकृतिप्रतिको सम्मान र सामूहिक सहकार्यको प्रतीक रहेको बताए।
