काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने अदालतको आदेशअनुसार रिहा भएका छन्। आज जिल्ला अदालत रुपन्देहीमा आवश्यक कागजी प्रक्रिया पूरा गरेपछि उनी रिहा भएका हुन्।
अदालतबाट मुक्त भएपछि लामिछाने भैरहवाबाट चितवन प्रस्थान गर्ने कार्यक्रम तय गरिएको छ। पार्टी स्रोतका अनुसार चितवनमा रहँदा उनले भोलि स्थानीय नेता–कार्यकर्ता तथा शुभेच्छुकहरूसँग भेटघाट गर्नेछन्। यस भेटघाटका क्रममा पार्टीको हालको अवस्था, भावी राजनीतिक रणनीति र संगठन विस्तारका विषयमा छलफल हुने अपेक्षा गरिएको छ।
चितवनमा एकदिने कार्यक्रम सम्पन्न गरेपछि लामिछाने भोलि साँझ काठमाडौँ फर्किने तालिका रहेको छ। उनको रिहाइसँगै रास्वपाका समर्थक तथा कार्यकर्ताहरूमा उत्साह देखिएको छ भने राजनीतिक वृत्तमा पनि यस विषयले चासो बढाएको छ।
रास्वपा नेतृत्वले लामिछानेको आगामी गतिविधि र कार्यक्रमहरूलाई पार्टी संगठनलाई थप सुदृढ बनाउने अवसरका रूपमा लिएको बताइएको छ।
