इजरायल हमलामा मारिएका १० विद्यार्थीमध्ये ४ जनाको शव काठमाडौंमा
- October 22, 2023
- 900
![](https://www.pokharaviews.com/wp-content/uploads/2023/10/Death-Body-from-Israel2-1024x683-1.jpg)
पोखरा भ्यूज
५ कात्तिक, काठमाडौं । इजरायलमा हमासको आक्रमणमा परी मारिएका १० विद्यार्थीमध्ये ४ जनाको शव काठमाडौं ल्याइएको छ । अझै ६ विद्यार्थीको शव ल्याउन बाँकी छ । पहिलो चरणमा विष्ट र धामी सहित नारायणप्रसाद न्यौपाने र आशिष चौधरीको शव नेपाल पठाइएको इजरायलस्थित नेपाली दूतावासले जनाएको छ । केही शव दिउँसो आइपुग्ने छ । अन्य ६ जना नेपालीको शव पठाउने प्रक्रिया पूरा गर्न भने केही दिन लाग्ने दूतावासले जनाएको छ ।
पहिलो चरणमा आज बिहान दीपेशराज विष्ट र लोकेन्द्रसिंह धामीको शव काठमाडौं ल्याइएको छ । शव नेपाली सेनाको ब्यारेकमा लगिएको छ । परराष्ट्र मन्त्री एनपी साउद, नेपालका लागि इजरायलका राजदूत पनि नेपाली सेनाको ब्यारेकमा पुगेका छन् । उनीहरूले श्रद्धाञ्जली अर्पण गरेका छन् ।
कृषि विषय पढ्दै कमाउँदै गर्न इजरायलमा पुगेका नेपाली विद्यार्थीहरु गत असोज २० गते हमासले गरेको आक्रमणमा परेका थिए । आक्रमणमा १० जना नेपालीको मृत्यु भएको पुष्टि भए पनि एक जना विपिन जोशीको अवस्था भने अझै अज्ञात छ । उनको खोजी भइरहेको दूतावासले जनाएको छ ।