पोखरा । हरेक वर्षझैँ यस वर्ष पनि अर्मलाकोटमा पर्वतीय दौड आयोजना हुने भएको छ । अर्मलाकोट पर्वतीय दौडको १०औँ संस्करण माघ ९ गते बिहान ७ बजे पोखराको केआईसिंह पुलबाट सुरु हुने भएको हो ।
पर्वतीय दौडका संयोजक जुम प्रसाद गुरुङका अनुसार १२ किलोमिटर दूरीको यो दौड केआईसिंह पुलबाट सुरु भई बाटुलेचौर, महेन्द्रगुफा, घार्मीखोला हुँदै डि गाउँ, टाडा बिसाउने र पात्ले पार गर्दै अर्मलाकोट पुगेर सम्पन्न हुनेछ ।
दौड सफलतापूर्वक सम्पन्न गर्न जुम गुरुङको संयोजकत्वमा ५१ सदस्यीय मूल आयोजक समितिगठन गरिएको छ । साथै अर्मलाकोटका पुराना बासिन्दा हाल बेलायतमा बसोबास गरिरहेका व्यक्तिहरूको आर्थिक सहयोगमा प्रतियोगिता आयोजना गर्न लागिएको हो । आर्थिक व्यवस्थापनमा जितबहादुर गुरुङको समन्वयमा किरण गुरुङले आर्थिक संयोजकको भूमिका निर्वाह गरेका छन् ।
प्रतियोगिता व्यवस्थापनका लागि विभिन्न उपसमिति गठन गरिएको छ । स्वयंसेवक संयोजकमा गंगाबहादुर गुरुङ, पुरस्कार व्यवस्थापनमा ईश्वर गुरुङ, भोजन व्यवस्थापनमा भीम गुरुङ, रुट (बाटो) व्यवस्थापनमा उदिम गुरुङ रहेका छन् । त्यस्तै संघ–संस्था समन्वयमा बबिन गुरुङ, प्रचार–प्रसारमा अमृत परियार, मञ्च व्यवस्थापनमा सचिन परियार, स्वास्थ्य संयोजकमा सोम परियार र अतिथि सत्कार संयोजकमा सूर्य सुबेदी रहेका छन् । अतिथि सत्कारको जिम्मेवारी अर्मलाकोट होमस्टे समिति र अर्मला आमा समूहलाई दिइएको छ भने सचिवालय व्यवस्थापन संयोजकमा ईश्वर गुरुङ रहेका छन् ।
दौड प्रतियोगितामा प्रथम हुनेलाई २५ हजार रुपैयाँ, द्वितीयलाई २० हजार, तृतीयलाई १५ हजार र सान्त्वना स्थान हासिल गर्नेलाई १० हजार रुपैयाँ नगदसहित मेडल र प्रमाणपत्र प्रदान गरिने अर्मलाकोट क्लबले जानकारी दिएको छ । साथै वडा नं. १६ स्तरीय दौड प्रतियोगिता पनि समावेश गरिएको छ ।
श्रीपञ्चमीको अवसरमा आयोजना हुने यस मेलामा स्थानीय सिद्ध बराह (म्हउदु बराह) को भव्य पूजागरिनुका साथै पर्वतीय दौडसँगै गाउँस्तरीय भलिबल प्रतियोगिता र छेलो प्रतियोगिता पनि सञ्चालन गरिनेछ । सबै कार्यक्रमका लागि आवश्यक तयारी पूरा भइसकेको संयोजक जुम गुरुङले जानकारी दिएका छन् ।
