पोखरा। पोखराको राजनीतिक क्षितिजमा फागुन २१ नजिकिँदै गर्दा एउटा नाम विशेष चर्चामा छ—रश्मि आचार्य। आगामी प्रतिनिधिसभा सदस्यको प्रत्यक्षतर्फको निर्वाचनमा नेकपा एमालेको तर्फबाट कास्की निर्वाचन क्षेत्र नम्बर २ का उम्मेदवार बनेका आचार्य केवल एउटा उम्मेदवार मात्र होइनन्; उनी अध्ययन, संगठन, निष्ठा र दीर्घकालीन प्रतिबद्धताले निर्माण गरेको नेतृत्वको प्रतिनिधि पात्रका रूपमा हेरिँदै आएका छन्। विद्यार्थी राजनीतिदेखि पार्टीको केन्द्रीय नेतृत्वसम्मको लामो यात्राले उनलाई आज यो मोडमा ल्याइपुर्याएको छ।
२०३७ सालमा पोखरा महानगरपालिका–३३, भरतपोखरीमा जन्मिएका रश्मि आचार्यको जीवन यात्रा साधारण परिवेशबाट सुरु भएको हो। ग्रामीण सामाजिक बनोट, श्रम र अनुशासनको मूल्यले उनको बाल्यकाललाई आकार दिएको देखिन्छ। प्रारम्भिक शिक्षा स्थानीय ब्रह्मज्योति प्राथमिक विद्यालयबाट सुरु गरेका उनले माध्यमिक तहसम्मको अध्ययन सोही ठाउँको श्री शान्ति उदय माध्यमिक विद्यालयबाट पूरा गरे। विद्यालय जीवनमै अनुशासित, जिज्ञासु र अध्ययनशील विद्यार्थीका रूपमा चिनिएका आचार्य पढाइ र नेतृत्व क्षमताको सन्तुलित संयोजन बोकेका विद्यार्थी थिए।
उच्च शिक्षाका लागि पोखराकै प्रतिष्ठित पृथ्वीनारायण क्याम्पस रोजेका आचार्यले त्यहाँबाट आईएस्सी उत्तीर्ण गरे। त्यसपछि व्यवस्थापन संकायमा प्रवेश गर्दै बीबीएस र एमबीएस पूरा गरे। यत्तिमै सीमित नरही उनले त्रिभुवन विश्वविद्यालयबाट राजनीतिशास्त्रमा स्नातकोत्तर उपाधि हासिल गरे, जसले उनलाई राजनीतिक सिद्धान्त, राज्य संरचना र शासन प्रणालीप्रति गहिरो समझ प्रदान गर्यो। अध्ययनप्रतिको उनको निरन्तर लगाव यहीँ रोकिएन। काठमाडौंस्थित नेपाल ल क्याम्पसबाट एलएलबी उत्तीर्ण गरी उनले कानुन व्यवसायीका रूपमा पनि अनुभव बटुले। हाल उनी अन्तर्राष्ट्रिय सम्बन्ध र कूटनीतिमा पीएचडी स्कलरका रूपमा अध्ययनरत छन्, जसले राष्ट्रिय राजनीतिलाई विश्व दृष्टिकोणबाट बुझ्ने उनको क्षमतालाई थप बल दिएको छ।
रश्मि आचार्यको राजनीतिक यात्रा कुनै आकस्मिक निर्णयको परिणाम होइन। उनी स्वयं भन्छन्, “मेरो राजनीतिक यात्रा विद्यालय जीवनदेखि नै सुरु भएको हो।” तत्कालीन नेकपा एमालेको विद्यार्थी संगठन अनेरास्ववियुबाट सुरु भएको यो यात्रा करिब तीन दशकसम्म विद्यार्थी राजनीतिमा निरन्तर सक्रिय रहँदै अघि बढ्यो। २०५० देखि २०७७ सालसम्म उनले विद्यार्थी आन्दोलन, संगठन विस्तार र नेतृत्व विकासमा आफूलाई पूर्णरूपमा समर्पित गरे।
२०६० सालमा अनेरास्ववियु कास्कीको अध्यक्ष बनेका आचार्यले संगठनलाई जिल्लास्तरमा मजबुत बनाउने काम गरे। २०६२ मा पृथ्वीनारायण क्याम्पसको स्ववियु सचिव र २०६५ मा सोही क्याम्पसको स्ववियु सभापति बनेर उनले विद्यार्थी हकहित, शैक्षिक सुधार र क्याम्पस व्यवस्थापनमा प्रभावकारी भूमिका निर्वाह गरे। यस्तै, २०६३ मा अनेरास्ववियुको गण्डकी अञ्चल कमिटी अध्यक्ष, २०६७ मा सचिवालय सदस्य र २०७० मा केन्द्रीय कोषाध्यक्ष त्यसपछि केन्द्रिय उपाध्यक्षको जिम्मेवारी सम्हाल्दै उनले संगठनात्मक क्षमताको प्रमाण दिए।
विद्यार्थी राजनीतिसँगै पार्टी राजनीतिमा पनि उनको कदम समानान्तर रूपमा अघि बढ्यो। २०५६ सालमै नेकपा एमालेको संगठित सदस्यता लिएका आचार्य २०६६ मा कास्की जिल्ला कमिटी सदस्य बने। त्यसपछि २०७८ मा गण्डकी प्रदेश कमिटीको उपसचिवको जिम्मेवारी पाउँदै उनले प्रदेशस्तरीय संगठन सुदृढीकरणमा योगदान दिए। हालै सम्पन्न नेकपा एमालेको ११औँ राष्ट्रिय महाधिवेशनबाट केन्द्रीय सदस्यमा निर्वाचित हुनु उनको दीर्घकालीन राजनीतिक यात्राको महत्वपूर्ण उपलब्धि मानिन्छ।
यसपटक कास्की–२ बाट उम्मेदवार बन्ने अवसर भने सहज रूपमा प्राप्त भएको थिएन। नेकपा एमालेको केन्द्रीय सचिवालयले सुरुमा उक्त क्षेत्रमा अनुभवी नेता कृष्ण थापालाई उम्मेदवार बनाउने निर्णय गरेको थियो। तर पार्टीभित्रको व्यापक छलफल, स्थानीय चाहना र नेतृत्व क्षमताको मूल्यांकनपछि त्यो निर्णय संशोधन गर्दै रश्मि आचार्यलाई उम्मेदवार बनाइयो। पोखरा नगरपालिकाका पूर्व प्रमुख तथा गण्डकी प्रदेशका पूर्व सांसदसमेत रहेका थापाजस्ता स्थापित नेतासँगै धेरै आकांक्षीहरूबीच प्रतिस्पर्धा थियो। प्रभा कोइराला, मीनाकुमारी गुरुङ, सञ्जीव बहादुर कोइराला, तेजनारायण अधिकारी, केशव आचार्य, भेषराज बराल, बलराम आचार्य, झपट रानाभाट र रामप्रसाद सुवेदी लगायतका आकांक्षीहरूबीच अन्ततः आचार्यले पार्टीको विश्वास जित्न सफल भए।
राजनीतिक निष्ठा, उच्च शैक्षिक योग्यता र विकासप्रतिको स्पष्ट दृष्टिकोणका कारण आचार्यलाई यसपटकको निर्वाचनमा आशालाग्दा उम्मेदवारका रूपमा हेरिएको छ। उनले आफूलाई जनताको सेवकका रूपमा प्रस्तुत गर्दै कास्की–२ को समग्र विकासका लागि नयाँ सोच र दीर्घकालीन योजनासहित काम गर्ने प्रतिबद्धता जनाएका छन्। स्वर्गीय नेता रवीन्द्र अधिकारीसँगको वैचारिक निकटता, एउटै भौगोलिक परिवेश र संगठनात्मक राजनीतिमा अधिकारीको प्रभावले पनि आचार्यको राजनीतिक सोचलाई आकार दिएको देखिन्छ। उनले रवीन्द्र अधिकारीले कोरेको समृद्धिको खाकालाई पूर्णता दिने लक्ष्यका साथ चुनावी मैदानमा उत्रिएको बताउँदै आएका छन्।
‘समृद्ध नेपाल, सुखी नेपाली’ भन्ने राष्ट्रिय संकल्पलाई स्थानीय तहमा व्यवहारिक रूपमा उतार्नु उनको प्रमुख एजेन्डा हो। युवा नेतृत्वमार्फत विकास अभियानलाई नयाँ उचाइमा पुर्याउने, नागरिकका दैनिक समस्यालाई सदनमा सशक्त रूपमा उठाउने र स्थानीय स्रोत–साधनलाई उत्पादन, रोजगारी र समृद्धिसँग जोड्ने प्रतिबद्धता उनले व्यक्त गरेका छन्। देशलाई सम्भावित दुर्घटनाबाट जोगाउन युवाको ऊर्जा र अग्रजहरूको अनुभवलाई एकसाथ उपयोग गर्ने उनको दृष्टिकोण राजनीतिक सन्तुलनको प्रतीक मानिन्छ।
उम्मेदवारी दर्तापछि आचार्यले पार्टीको आग्रह र जनताको चाहनाअनुसार आफू मैदानमा उत्रिएको स्पष्ट पारेका छन्। उनले आफ्नो उम्मेदवारी कुनै व्यक्तिगत महत्वाकांक्षाको परिणाम नभई राष्ट्रिय अभियानलाई ठोस निष्कर्षमा पुर्याउने प्रयास भएको उल्लेख गर्दै राजनीति र विकासलाई गौरव गर्न लायक बनाउनेतर्फ केन्द्रित रहने प्रतिबद्धता जनाएका छन्। देश र जनताको हितका लागि सम्पूर्ण जीवन समर्पण गर्ने दृढ संकल्पका साथ स्पष्ट योजना र उद्देश्य बोकेर आफू मतदातासमक्ष आएको उनको भनाइ छ।
यसै क्रममा उनले कास्की–२ का मतदातासँग प्रत्यक्ष भेटघाट, छलफल, विमर्श र अन्तर्क्रिया गर्ने घोषणा गरेका छन्। वर्तमान सन्दर्भमा उठाउनुपर्ने मुद्दा, स्थानीय विकासका प्राथमिकता र चुनावी प्रतिबद्धता पत्रमा समावेश गर्नुपर्ने विषयहरूबारे सुझाव दिन उनले सबैलाई आग्रह गरेका छन्। प्रत्यक्ष भेटघाट मात्र होइन, अन्य वैकल्पिक माध्यमबाट पनि सुझाव संकलन गर्ने उनको योजना सहभागितामूलक राजनीतिप्रतिको संकेत हो।
यसरी हेर्दा, रश्मि आचार्यको उम्मेदवारी केवल एउटा निर्वाचनको विषय मात्र होइन; यो अध्ययन, संगठन, अनुभव र प्रतिबद्धताले निर्माण गरेको नेतृत्वको परीक्षा हो। कास्की–२ का मतदाताले यो यात्रालाई कसरी मूल्यांकन गर्छन् भन्ने कुरा आगामी निर्वाचनले स्पष्ट गर्नेछ।
