PokharaViews

पोखरा। गण्डकी प्रदेशका मुख्यमन्त्री सुरेन्द्रराज पाण्डेले अनुसन्धान, प्रविधिको प्रयोग र उत्पादनसँग प्रत्यक्ष जोडिएको शिक्षा प्रणाली अहिलेको नेपालका लागि अपरिहार्य भएको बताएका छन्। गण्डकी विश्वविद्यालय द्वारा आयोजित प्रथम दीक्षान्त समारोहलाई सम्बोधन गर्दै उनले परम्परागत शिक्षाले मात्र देशको आर्थिक रूपान्तरण सम्भव नहुने उल्लेख गरे। वैज्ञानिक अनुसन्धान, नवप्रवर्तन र प्रविधिको समुचित प्रयोगमार्फत उत्पादनशील जनशक्ति तयार पार्नुपर्नेमा उनले जोड दिए।

मुख्यमन्त्री पाण्डेले शिक्षा प्रणालीलाई उद्योग–व्यवसायसँग जोड्न नसक्दा देशले दक्ष जनशक्ति गुमाइरहेको धारणा राखे। “उच्च शिक्षा पूरा गरेपछि ठूलो सङ्ख्यामा युवा विदेशिने प्रवृत्ति बढ्दो चिन्ताको विषय बनेको छ,” उनले भने, “अबको शिक्षा रोजगारी सिर्जना गर्ने, उद्यमशीलता विकास गर्ने र देशभित्रै अवसर सिर्जना गर्ने खालको हुनुपर्छ।” उनले प्रदेश सरकारले शिक्षालाई आर्थिक विकाससँग प्रत्यक्ष जोड्ने नीतिमा काम गरिरहेको पनि जानकारी दिए।

समारोहमा शिक्षाविद् केदारभक्त माथेमाले बदलिँदो विश्व परिवेशअनुसार शिक्षा प्रणालीको स्वरूप परिवर्तन गर्नुपर्ने आवश्यकता औंल्याए। उनले बजारमुखी, अनुसन्धानमुखी र कृत्रिम बौद्धिकता (एआइ)सँग सम्बन्धित विषयलाई पाठ्यक्रममा समावेश गर्नुपर्ने बताए। “विद्यार्थीलाई केवल जानकारी दिने होइन, सोच्ने, विश्लेषण गर्ने र समाधान निकाल्ने क्षमता विकास गरिनुपर्छ,” उनले भने, “त्यसैले शिक्षा प्रणालीलाई व्यावहारिक र सृजनशील बनाउन जरुरी छ।”

विश्वविद्यालयका कुलपति इन्द्रप्रसाद तिवारीले गण्डकी विश्वविद्यालयलाई अनुसन्धानमुखी, प्रविधिमैत्री तथा अन्तर्राष्ट्रियस्तरको शैक्षिक केन्द्रका रूपमा विकास गर्ने लक्ष्य लिइएको बताए। उनले अनुसन्धान केन्द्र विस्तार, सरकारी तथा गैरसरकारी निकायसँग सहकार्य र समुदायमा आधारित अध्ययन–अनुसन्धानलाई प्राथमिकता दिइने जानकारी दिए। यसले स्थानीय स्तरमै ज्ञान उत्पादन र प्रयोगलाई प्रवर्द्धन गर्ने विश्वास व्यक्त गरे।

विश्वविद्यालय न्यासिक परिषद्का अध्यक्ष कैलाशनाथ प्याकुरेलले अब विश्वविद्यालय भौतिक पूर्वाधार निर्माणभन्दा गुणस्तरीय शिक्षा र संस्थागत सुदृढीकरणतर्फ केन्द्रित हुनुपर्ने बताए। उनले दीर्घकालीन शैक्षिक गुणस्तर सुधारका लागि नीतिगत स्थायित्व र नेतृत्वको स्पष्ट दृष्टिकोण आवश्यक रहेको धारणा राखे।

दीक्षान्त समारोहमा स्नातक तहमा उत्कृष्ट प्रदर्शन गर्दै उच्चतम सीजीपीए हासिल गर्ने गौरव भण्डारीले कुलपति पदक प्राप्त गरे। त्यस्तै गौरव भण्डारीसँगै मलिनकुमार रोका र क्याटरिना बस्नेतले उपकुलपति पदक प्राप्त गरे। उनीहरूको उपलब्धिले विश्वविद्यालयको शैक्षिक स्तर र प्रतिस्पर्धात्मक वातावरणलाई झल्काउने विश्वास गरिएको छ।

समारोहमा खेलकुद व्यवस्थापनतर्फ ११, सूचना प्रविधितर्फ १८ र औषधि विज्ञानतर्फ १५ गरी कुल ४४ विद्यार्थी दीक्षित भएका छन्। पहिलो दीक्षान्त समारोहमार्फत विश्वविद्यालयले नयाँ शैक्षिक यात्राको महत्वपूर्ण अध्याय प्रारम्भ गरेको छ।