माघ १४ देखि वालिङ महोत्सव : व्यापार, कृषि, पर्यटन र संस्कृतिको भव्य संगम
स्याङ्जा | स्याङ्जाको मध्यभागमा रहेको वालिङ शहर आगामी माघ १४ देखि २५ गतेसम्म नवौं वालिङ महोत्सव २०८२ मनाउन तयार हुँदैछ। दुई–दुई वर्षको अन्तरालमा आयोजना हुँदै आएको यस महोत्सवले वालिङको पहिचान मात्र होइन, स्याङ्जा जिल्लाकै गौरव बनेको छ। स्थानीयवासीका लागि त माघ १४ आउनु नै चाडपर्वसरह उत्साहको विषय बनिसक्यो।
आँधीखोलाको मनोहर किनारमा बसेको वालिङ बजार समथर भूभाग, आकर्षक वातावरण र व्यावसायिक गतिविधिका कारण पहिल्यै चर्चित छ। यस्तै शहरमा आयोजना हुने महोत्सवले देशभरका दर्शक, व्यापारी र पर्यटकलाई आकर्षित गर्दै आएको छ।
गत फागुनमै महोत्सव गर्ने निर्णय भएपछि वालिङ उद्योग वाणिज्य संघले तयारीलाई तीव्रता दिएको छ। संघले प्रकाशित गरेको २०८२ सालको क्यालेन्डरमा समेत महोत्सवको मिति उल्लेख गरिएको छ।
“हाम्रो गौरव हाम्रो शान, वालिङ महोत्सव हाम्रो पहिचान” भन्ने मूल नाराका साथ गण्डकी प्रदेशस्तरीय कृषि, पर्यटन, सांस्कृतिक तथा औद्योगिक व्यापार मेलाको रूपमा यो महोत्सव विस्तार हुँदै आएको छ। आयोजकको भनाइमा महोत्सवलाई यस वर्ष “फरक र पृथक” बनाउने तयारी भइरहेको छ।
मुख्य प्रदर्शनी र कार्यक्रमहरूमा व्यापारीक तथा औद्योगिक व्यापार मेला, विद्यालयस्तरीय नृत्य प्रतियोगिता, लोकदोहोरी प्रतिस्पर्धा, सुन्तला तथा ताजा तरकारी प्रदर्शनी, अर्गानिक कफी प्रदर्शन, अदुवा तथा जडीबुटी प्रदर्शनी, पशुपंक्षी तथा उन्नत कृषि प्रविधि प्रदर्शनी, सूचना प्रविधि तथा शैक्षिक प्रदर्शनी, खेलकुद प्रतियोगिता, बालउद्यान, हस्तकला प्रदर्शनी, स्थानीय कला–संस्कृति प्रस्तुति लगाएत रहेका छन्। यी कार्यक्रमहरूले सबै उमेर समूहका दर्शकलाई आकर्षित गर्ने आयोजकहरूको विश्वास छ।
दर्शक लक्ष्य र आर्थिक प्रभावमा ३ लाख दर्शकको उपस्थिति, १० करोड रुपैयाँ बराबरको अल्पकालीन कारोबार लक्ष्य, १ करोड ७६ लाख आम्दानी, १ करोड २ लाख खर्च, ७३ लाख रुपैयाँ अनुमानित बचत गर्ने लक्ष्य लिएको छ। यस्ता आर्थिक गतिविधिले स्थानीय बजारदेखि प्रदेशव्यापी व्यापारिक वातावरणमा समेत सकारात्मक प्रभाव पर्ने अपेक्षा गरिएको छ।
“महोत्सव वालिङको मात्र होइन, जिल्लाकै पहिचान” बन्दै आएको वालिङ उद्योग वाणिज्य संघका अध्यक्ष चेतनारायण श्रेष्ठ भन्छन्—“यो महोत्सव वालिङको मात्र होइन, स्याङ्जा जिल्लाकै पहिचान हो। यस वर्ष हामी कार्यक्रमलाई अझ व्यवस्थित, आकर्षक र सहभागितामूलक बनाउने लक्ष्यसहित अघि बढेका छौँ।” गण्डकी प्रदेशमा लेखनाथ महोत्सवपछि निरन्तर सफल मानिने वालिङ महोत्सवले—स्थानीय पर्यटन प्रवर्द्धन, कृषि उत्पादनको बजार विस्तार, कला–संस्कृतिको संरक्षण, व्यावसायिक वातावरणको सुदृढीकरणमा उल्लेखनीय योगदान दिंदै आएको छ।
प्रदेशको गौरव, वालिङवासीको उत्सव बनेको यस महोत्सब नवौं संस्करणसम्म आइपुग्दा महोत्सव वालिङवासी मात्र होइन, सिंगो जिल्लावासीको सामूहिक अभियानजस्तै बनेको छ। स्थानीय उत्पादनको प्रवर्द्धनदेखि सांस्कृतिक एकता र पर्यटन विकाससम्म—महोत्सवले प्रदेशको गौरव बढाउने भूमिकामा आफूलाई स्थापित गरिसकेको छ।
सम्बन्धित खवर
