PokharaViews

पोखरा भ्यूज

काठमाडौं– नेपालीहरूको महान् चाड वडादशैंको दशौं अर्थात् मुख्य दिन शुक्रबार मान्यजनका हातबाट टीका तथा जमरासहित आशिष थापेर मनाइदैं छ । नेपाल पञ्चाङ्ग निर्णायक समितिकाका अनुसार विहान ८ः१९ मा देवी पूजा विसर्जन र विहान १०ः०२ बजे टीका लगाउने शुभ साइत रहेको छ । यद्यपि दशैंका दिन आज दिनभर देवीको प्रसाद लगाउने साइत भए पनि दिनभरमध्येमा राम्रो समयको साइत १०ः०२ बजेको दिइएको हो ।
आज चन्द्रमा मकर राशिमा रहेकाले टीका थाप्ने पूर्व फर्कनुपर्ने र लगाइदिने पश्चिम फर्कदाँ मकर राशिमा रहेका चन्द्रमा दाहिने हुन्छन् । चन्द्रमा दाहिने वा सम्मुख पारेर टीका लगाउनुपर्ने शास्त्रीय मान्यता छ । आफ्ना मान्यजनबाट टीका ग्रहण गर्दा अरू फूलको सट्टा समृद्धिको प्रतीक पहेंलो जमरा नै प्रयोग गरिन्छ । घटस्थापनाका दिन राखिएको जमरा आज नवदुर्गाको प्रसादका रूपमा लगाइन्छ । पौराणिक कालदेखि नै असत्यमाथि सत्य र आसूरी शक्तिमाथि दैवी शक्तिको विजयका रूपमा बडादसैँ पर्व मनाउने परम्परा बसेको हो । पर्वअन्तर्गत नवरात्रिका उपलक्ष्यमा घटस्थापनादेखि नौदिनसम्म विभिन्न शक्तिपीठ तथा दशैंघरमा प्रत्येक दिन पूजाअर्चनासहित दुर्गा सप्तशती चण्डी र भगवतीको स्तोत्र पाठ गरेपछि त्यसको प्रसाद आजदेखि कोजाग्रत पूर्णिमामा अखिल बलि पूर्ति नभएसम्म लगाउने चलन छ ।
आजका दिन परिवारमा आफूभन्दा ठूलाबडा, बाजेबज्यै, बाबुआमा, गुरूपुरोहित तथा मान्यजनको हातबाट नवदुर्गा भवानीको टीका, जमरा तथा प्रसाद थापी उनीहरूबाट यश, ऐश्वर्य श्रीवृद्धि तथ दीर्घायु प्राप्त होस् भनी आशीर्वाद लिने गरिन्छ ।