संसद् पुनर्स्थापनाको मागले देशलाई अस्थिरतामा धकेल्छ : प्रधानमन्त्री कार्की
काठमाडौँ । प्रधानमन्त्री सुशीला कार्कीले संसद् पुनर्स्थापनाको माग र सरकारको वैधानिकतामाथि उठाइएका प्रश्नहरूले देशलाई पुनः अस्थिरतामा धकेल्ने चेतावनी दिएकी छिन्। सिंहदरबारमा निर्वाचन आयोगमा दर्ता भएका १२५ राजनीतिक दलका प्रतिनिधिसँग जारी छलफलका क्रममा प्रधानमन्त्री कार्कीले चुनाव घोषणापछि समेत केही दलमा देखिएको अन्योल राष्ट्रका लागि घातक बन्न सक्ने बताइन्।
प्रधानमन्त्री कार्कीका अनुसार, “निर्वाचनको घोषणापछि पनि केही दलमा देखिएको अन्योल, संसद् पुनर्स्थापनाको माग तथा सरकारको वैधानिकतामा उठाइएका प्रश्नहरूले राष्ट्रलाई फेरि अस्थिरताको चक्रमा धकेल्न सक्छ।” उनले सरकार संवैधानिक अडानमा पूर्णतया स्पष्ट रहेको दोहोर्याइन्।
“आगामी फागुन २१ मा प्रतिनिधिसभा सदस्य निर्वाचन सम्पन्न गर्नु हाम्रो संवैधानिक दायित्व र जनताप्रतिको अटल प्रतिबद्धता हो। हाम्रो संवैधानिक अडानमा कुनै अलमल छैन, निर्वाचनको अनिवार्यताबारे हाम्रो अडान दह्रिलो छ,” प्रधानमन्त्रीले भनिन्।
प्रधानमन्त्री कार्कीले राजनीतिक दलहरूलाई अहिलेको बहसलाई संवैधानिक निकास—अर्थात् आगामी निर्वाचन—तर्फ केन्द्रित गर्न आग्रह गरिन्। उनले भनिन्, “अब संसद् पुनःस्थापनाको अडान लिन खोज्नु भनेको विगतको राजनीतिक दुर्घटनालाई दोहोर्याउने कोसिस मात्रै हो। त्यसैले अबको राजनीतिक बहस निर्वाचनमै केन्द्रित हुनुपर्छ।”
प्रधानमन्त्री तथा मन्त्रिपरिषद्को कार्यालय, सिंहदरबारमा बुधबार आयोजना गरिएको छलफल आगामी फागुन २१ गते हुने प्रतिनिधिसभा निर्वाचन तयारी केन्द्रित थियो।
सम्बन्धित खवर
