कश्यप गोत्रीय अलिना अधिकारीको कुल पूजा हुने : १३ प्रतीकले झल्काएको छ पूर्खाको गौरव
माछापुच्छ्रे, कास्की । कास्की जिल्लाको माछापुच्छ्रे गाउँपालिका–६, अस्तामस्थित कश्यप गोत्रीय अलिना अधिकारीहरूको कुलपूजा आगामी मंसिर १८ गते, बिहिबार विशेष रूपमा आयोजना हुने भएको छ।
देशभर छरिएर बसेका कश्यप गोत्रीय अलिना अधिकारी बन्धुहरूलाई एक ठाउँमा ल्याउने, पहिचान संरक्षण गर्ने तथा संस्कार–संस्कृति जगेर्ना गर्ने उद्देश्यले निर्माण गरिएको कुलमन्दिर २०७९ मंसिर २३ गते विशेष समारोहकाबीच उद्घाटन गरिएको थियो। हरेक तीन वर्षमा गरिने कुलपूजा दोस्रो पटक रहेको अधिकारी समाज अस्ताम इकाई समितिका अध्यक्ष विश्वराज अधिकारीले जानकारी दिए।
कुलमन्दिरलाई पूर्खाको सम्मान र स्मरण स्वरूप विशेष प्रतीकात्मक संरचनाका साथ निर्माण गरिएको छ। मन्दिरमा रहेका १३ ढोका, १३ छाना र १३ सिँढी कश्यप ऋषिका १३ पत्नीहरूलाई प्रतिनिधित्व गर्छन्। यी संरचनाले कुलवंशको गौरव, इतिहास र पहिचानलाई दृश्य रूपमा अभिव्यक्त गर्ने भएकाले मन्दिरको महत्व झनै बढेको अध्यक्ष अधिकारीले बताए।
अघिल्ला वर्षहरूमा आयोजित कुलपूजामा देशैभरबाट उल्लेख्य संख्यामा अधिकारी बन्धुहरूको सहभागिता रहँदै आएको छ। सहभागीहरूले कुलपूजाले बन्धुत्व, सद्भाव र सांस्कृतिक पहिचान अभिवृद्धिमा महत्वपूर्ण योगदान पुर्याउँदै आएको धारणा राख्दै आएका छन्।
विदेशी संस्कृतिको प्रभाव बढ्दै गएको वर्तमान परिवेशमा आफ्नै परम्परा सुरक्षित राख्न कुलपूजाले नयाँ पुस्तालाई प्रेरित गर्ने विश्वास लिएको माछापुच्छ्रे गाउँपालिका–कास्कीकी उपाध्यक्ष सिता अधिकारीले बताइन्। उनले देशभरका कश्यप गोत्रीय अलिना अधिकारीहरूलाई यस वर्षको कुलपूजामा सहभागी हुन पनि आग्रह गरिन्।
कुलपूजामा अधिकारी बन्धुहरूको घर–घरबाट ल्याइने सामग्री प्रयोग गरी विशेष विधिअनुसार खीर र पुवा तयार पारिने र मन्त्रोच्चारणसहित पूजा सम्पन्न गर्ने परम्परा रहेको अध्यक्ष अधिकारीले जानकारी दिए।
उनका अनुसार अधिकारीहरूको मूल थातथलो जुम्लाको सिंजा तथा देवार र नुवागाउँ क्षेत्र मानिन्छ। नुवागाउँ निवासी उन्या अधिकारीको वि.सं. १३२० को ताम्रपत्रमा उल्लेखित विवरणले पनि यही ऐतिहासिक पृष्ठभूमि पुष्टि गर्छ।
सम्बन्धित खवर
