नवौँ राष्ट्रिय खेलकुद प्रतियोगितामा लोकदोहोरी तथा लोकनृत्य प्रतियोगिता थप गर्ने प्रस्ताव
जेठ २२ देखि २८ गतेसम्म गण्डकी प्रदेशमा हुने नवौँ राष्ट्रिय खेलकुद प्रतियोगिता अन्तर्गतका खेलहरु प्रदेशका ११ वटै जिल्लामा गर्ने प्रस्ताव गरिएको छ । सम्बन्धित जिल्लामा खेलप्रतिको आकर्षण बढाउन तथा खेलाडीको चापलाई व्यवस्थित गर्नकालागि पनि प्रत्येक जिल्लामा खेल आयोजना गर्ने प्रस्ताव गरिएको हो । जस अनुसार पुरुष फुटबलसहित एथलेटिक्स, बक्सिङ, भारोत्तोलन, भलिबल, ब्याडमिन्टन, उसु, ह्याण्डबल, हक्की, स्क्वास र सुटिङका महिला तथा पुरुषका खेल पोखरामा सञ्चालन गरिने भएको छ । यसैगरी जिम्न्याष्टिक, लनटेनिस, सफ्टटेनिस, क्रिकेट, साइक्लिङ, आर्चरी, पौडी, गल्फ, शारीरिक सुगठन, प्याराग्लाइडिङ र ट्रायथोलनका महिला तथा पुरुषका खेल पनि पोखरामै गर्ने प्रस्ताव गरिएको छ । महिला फुटबल स्याङ्जाको वालिङ, तेक्वान्दो (महिला–पुरुष) बागलुङ, कराते (महिला–पुरुष) लमजुङ, टेवलटेनिस (महिला–पुरुष) मुस्ताङ, कबड्डी, कुस्ती र खोखो (महिला–पुरुष) नवलपुर तथा जुडो र सेपाकताक्रो (महिला–पुरुष) गोरखामा खेलाउने योजना छ । बास्केटबल (महिला–पुरुष) तनहुँ, बुद्धिचाल (महिला–पुरुष) मनाङ, आइटिएफ तेक्वान्दो (महिला–पुरुष) म्याग्दी, फुलकन्ट्याक्ट कराते (महिला–पुरुष) स्याङ्जा र फेन्सिङ (महिला–पुरुष) पर्वतमा गर्न राष्ट्रिय खेलकूद परिषद् समक्ष प्रस्ताव गरी पठाइएको समितिले जनाएको छ । यस वर्षदेखि आयोजना गर्न प्रस्ताव गरिएको लोकदोहोरी तथा लोकनृत्य प्रतियोगिता पोखरामा गर्ने योजना पश्चिमाञ्चल खेलकूद विकास समितिले बनाएको छ । यसैगरि ३५ वटा पुराना सहित २ वटा नयाँ खेल थप गर्ने प्रस्ताव गरिएको छ । कोभिड महामारीका कारण गत बर्ष हुन नसकेको प्रतियोगिता जेठ महिनाको अन्तिम साता गण्डकी प्रदेशमा गर्ने निर्णय सरकारले गरेको थियो । प्रतियोगितामा रग्बी र ठेलो खेलकासाथै प्रदेशको मौलिक दोहोरी तथा लोक नृत्यलाई पनि प्रतियोगितामा थप गर्न प्रस्ताव गरिएको छ । खेल पूर्वाधारको अवस्था तथा सम्बन्धित जिल्लामा खेलप्रतिको आकर्षणलगायतका पक्षलाई ध्यानदिंदै केन्द्रको प्राविधिक टोलीको अनुगमनका आधारमा निर्णय लिइने पनि समितिले जनाएको छ । राष्ट्रिय खेलकुदअन्तर्गत राष्ट्रिय खेलकुदका लागि आवश्यक खेल पूर्वाधार निर्माणका लागि चालु आवमा राखेपबाट रु १६ करोड बजेट विनियोजन गरिएको छ ।।
सम्बन्धित खवर
