पोखरा भ्यूज
पोखरा, २ भदौ/ पोखरामा रहेको चरक मेमोरियल अस्पतालले पहिलोपटक मुटुको सफल शल्यक्रिया (ओपनहार्ट सर्जरी) गरेको छ । पोखरामा पहिलोपटक ओपन हार्ट सर्जरी गरेको अस्पतालका निर्देशक कपिल पोखरेलले शुक्रवार पत्रकार सम्मेलन गरी जानकारी दिए ।
पोखराका ४५ वर्षका विष्णु गौतमको निःशुल्क ओपन हार्ट सर्जरी गरिएको हो । ओपन हार्ट सर्जरी गरेर बिरामीको मुटुको ब्लक भएका दुई वटा ठूला नशा फेरिएको प्रमुख सर्जन डा अनिल भट्टराईले पत्रकार सम्मेलनमा जानकारी दिए ।
मनमोहन कार्डियाक सेन्टरका विभागीय प्रमुख डा भट्टराईको नेतृत्वमा सर्जन डा कृष्ण बस्याल, डा अर्जुन गुरुङलगायतको टिमले ३ घण्टा लगाएर सफल ओपन हार्ट सर्जरी गरेको थियो ।
पोखराका बिभिन्न अस्पतालमा ट्रान्सक्याथेटर एओर्टीक भल्ब इम्प्लान्टेसन (टिएभिआई) लगायत प्रविधिबाट मुटुको उपचार गरिदै आएपनि ओपन हार्ट सर्जरी भने पहिलो पटक भएको हो ।
डा. भट्टराईका अनुसार गौतमको मुटुको दुई ठूला नसा ब्लक भएको थियो । हात र घाँटीको नसा मुटुमा हालेर सर्जरी गरिएको हो । अप्रेसन अवधि करिब ३ घण्टा लागेको थियो ।
पहिलो सर्जरी भएकाले निःशुल्क गरिएको अस्पतालले जनाएको छ । ओपन हार्ट सर्जरीका लागि अवस्था हेरी खर्च लाग्ने चिकित्सकहरु बताउँछन् । सर्जरीका लागि सामान्यतया ५/६ लाख लाग्ने पनि डा. भट्टराईले बताए ।
सहिद गंगालाल राष्ट्रिय हृदय केन्द्र र मनमोहन कार्डियोथोरासिक भास्कुलर एण्ड ट्रान्स प्लान्ट सेन्टरमा मात्र मुटुका बिरामीले विपन्न शीर्षकमा १ लाख रुपैयाँ सहयोग पाउने तर अन्य ठाउँमा नपाइने भएपनि पोखराको चरकमा त्यो सुविधा शुरु भएको अस्पतालका निर्देशक पोखरेलले बताए ।
ओपन हर्ट सर्जरीका लागि १ महिनाअघि नेपाल सरकारबाट स्वीकृत लिई आवश्यक सामाग्री जडान गरिएको पोखरेलले बताए । ‘हामी सर्जरीका लागि तयार भएका छौं । अब सबै तयार छौँ, सर्जरीका लागि काठमाण्डौका चिकित्सकसँग समन्वय गरेर सबै सर्जरी यहीँ गर्न सक्षम छौँ ।’ पोखरेलले भने । अस्पतालले करिब ३ करोडको लागतमा मुटुरोगका लागि आवश्यक इक्विपमेन्ट खरिद गरेको पनि निर्देशक पोखरेलले बताए ।
नेपालमा १९९७ बाट विदेशी (अस्टेलियन) डाक्टर आएर पहिलो पटक मुटुको उपचार सुरु भएको डा भट्टराईले सम्झिए । नेपालमा अहिले ओपन हार्ट सर्जरी नै २ हजार २५ सय वार्षिक रुपमा हुदै आएको उनको भनाई छ ।काडियोलोजीको इन्टर भेन्सन सहित वर्षमा ६ /७ हजार मुटुको उपचार हुने गरेको डा भट्टराईको भनाई छ ।