कविता र गीतमार्फत श्रमिक एकताको सशक्त सन्देश
शान्ता बास्तोला
दमौली, तनहुँ।
ट्रेड युनियन कांग्रेस गण्डकीको दोस्रो प्रदेश परिषद् बैठकमा पार्षद शान्ता बास्तोलाले कविता र गीतमार्फत व्यक्त गरेको शुभकामना मन्तव्यले कार्यक्रमलाई विशिष्ट साहित्यिक उचाइमा पुर्याएको छ। श्रमिक अधिकार, एकता र संघर्षका भावनाहरूलाई शब्द र संगीतमा सशक्त ढंगले उनेर उनले उपस्थित सहभागीहरूलाई गहिरो भावनात्मक स्पर्श गरिन्।
“श्रमको सम्मान गरौँ” भन्ने मूल नाराबाट मन्तव्य प्रारम्भ गर्दै उनले श्रमिक सम्मान र अधिकार संरक्षणप्रति दृढ प्रतिबद्धता व्यक्त गरिन्।
श्रमको सम्मान गरौँ भन्ने नारा बोकेर,
हिँड्यौँ हामी दिलोज्यान सुम्पेर।
एकको पीडामा अर्काले मलम लगाउँदै,
मजदुरको आवाज अझ बुलन्द बनाउँदै।
“एकको पीडामा अर्कोले मलम लगाउँदै” भन्ने पंक्तिमार्फत उनले सहकार्य र एकताको अपरिहार्यता स्पष्ट पारिन्।
समसामयिक चुनौतीतर्फ संकेत गर्दै उनले ट्रेड युनियनमाथि देखिएका अवरोध र दमनका प्रयासप्रति कडा आपत्ति जनाइन्—
सुनिँदैछन् बजारका हल्ला—खारेज हुन्छ रे,
अन्यायविरुद्धको आवाज अब थुन्छ रे।
खारेज कसले गर्ने? त्यही सिंहदरबार जलाउनेले?
निहत्था बालकको छातीमा गोली चलाउनेले?
उनको स्वर केवल काव्यात्मक मात्र नभई प्रतिरोध र चेतनाको स्पष्ट अभिव्यक्ति थियो। “हामी एक भयौँ भने कसैले दबाउन सक्दैन” भन्ने सन्देशमार्फत उनले एकताको शक्तिलाई केन्द्रीय भाव बनाइन्।
खबरदार!
तिमी नजन्मँदै जन्मिएको हाम्रो ट्रेड युनियनलाई,
केटाकेटीको खेल ठानी घृणा गर्नेहरूलाई—
छोड्ने छैनौँ हामी, यदि दमन गर्न खोज्यौ भने,
सत्यको आवाज रोक्न अघि बढ्यौ भने।
गीतले थप्यो आत्मीयता
कार्यक्रममा प्रस्तुत गरिएको “बेनीको बजार जता…” गीतले वातावरणलाई अझ आत्मीय र सांस्कृतिक बनायो। साथीभाव, पुनर्मिलनको खुसी र संगठनात्मक सम्बन्धको निरन्तरताको सन्देश गीतमार्फत प्रभावकारी रूपमा प्रवाह भयो।
बेनीको बजार जता, साथी उतै नजर,
किरेमिरे जाली रुमाल…
आज मलाई कति खुसी लाग्छ,
ट्रेड युनियनका साथीसँग भेट हुन्छ।
सहज भयो आज निदाउन रात,
म्याग्दीका साथीसँग छ आत्मीय साथ।
किरेमिरे जाली रुमाल…
कविता र गीतको संयोजनले मन्तव्यलाई औपचारिक शुभकामनामा सीमित नराखी सशक्त साहित्यिक अभिव्यक्तिमा रूपान्तरण गर्यो। सहभागीहरूले बास्तोलाको प्रस्तुति प्रेरणादायी, सन्देशमूलक र ऊर्जादायी रहेको प्रतिक्रिया दिएका थिए।
अन्त्यमा उनले नयाँ वर्ष २०८३ को अवसरमा सम्पूर्ण श्रमिक वर्गबीचको एकता अझ मजबुत बन्ने विश्वास व्यक्त गर्दै मन्तव्य टुंग्याइन्—
बैठकमा ध्यान दिएर सुन्नेछौँ,
अब पर्वतमा फेरि भेट्नेछौँ।
किरेमिरे जाली रुमाल…
दबाउन सक्दैन कसैले, यदि हामी एक भयौँ भने,
एकताको माला भित्र हाम्रो शक्ति गाँसियो भने।
बन्द होइन—झन् सशक्त बन्छ हाम्रो अभियान,
नयाँ वर्ष २०८३ को हार्दिक शुभकामना।
© कपीराईट–यस पोष्टमा प्रकाशित समाचार या लेख सर्वाधिकार सुरक्षीत छ । यहाँ प्रकाशित समाचार हुबहु कसैले
जानकारी विना साभार गरेको पाइएमा कानुनी कार्वाही गर्न बाध्य हुनेछौ ।
सम्बन्धित खवर
